Ogni vota ca arrivu na stu pizzu ‘i cantunera
taliu a tutti, e mi pari na “bufera”.
Sta cosa a mia non mi pari strana,
picchi sacciu ca iddi riciunu:”sta arrivannu Tramuntana”!
Taliannu attonnu attonnu a stu pizzu ‘i cantunera
ci su: u bar, a pizzeria e u fruttaiolo, ca prima non c’era,;
u jocu ra schidina, a videoteca, u’rilugiaru, u pannitteri e n’autra cosa…
c’è macari a Ci Gi Elli, sutta u toccu ‘i nonna Rosa.
C’è sempri unu ca parra e cu ci fa u cummentu,
stannu arreri ‘o muru pi non stari ‘o straventu;
na sta cantunera, stannici assai
viri macari genti ca na vistu mai.
Dda vicinu c’è ‘n pisolu, ma comu rici u zù Puddu,
ri quant’avi ca casca a rina non ci s’assetta chiù nuddu…
pecciò stamu sempri addritta e ni mittemu a sghizzari
e non parramu ri nenti su n’avemu a nuddu ri sparrari!
Sutta stu ranni cielu di Maria
c’è cu iè ca sfutti e cu iè ca si siddia;
c’è quaccunu indecisu, ca fa u tira e molla,
poi si convinci si joca a schidina, nesci fora e s’a controlla.
E su ppi casu quannu arrivu, non trovu a nuddu cu cù parrari
mi staiu femmu e mi mettu a taliari…
dopu n’pocu ca sugnu sulu, taliu a destra e a manca
e mi ricu: “Caru miu a sta vota è ianca!!”
Aspettu ancora nautru quartu r’ura
sempri femmu dda a taliari
finu a quannu mi ricu: “ Sissignura
ppi stasera mi pozzu arritirari!”
Tremestieri Etneo, 14/01/2003
Vincenzo Mangano (Tramuntana)
Leave a comment